Durante o ano 2014, baixo a dirección do Prof. Francisco Xabier Aguiar
Fernández, levouse a cabo unha investigación que pretendía verificar cál fora o
impacto da crise nas familias da provincia de Ourense e cáles delas se atopan
nun maior grado de vulnerabilidade e exclusión social. A equipa de
investigación estivo formada ademais por Carmen Verde-Diego; Xoan Lombardero,
Ana Belén Méndez, Iria Vázquez, Santiago Prado e Almudena Ferro. Para valorar a
intensidade dos seus efectos, preguntóuselle, a través dun cuestionario, ás
traballadoras sociais de tódolos municipios ourensáns, xa que logo son elas a
primeira canle de detección das necesidades das familias que acoden aos
servizos sociais a pedir axuda. A investigación completouse con entrevistas en
profundidade a expertos/as en contacto coa intervención directa con
familias.
Entre os resultados, púidose constatar o gran impacto da crise nas familias
ourensás que provocou, entre outros, cambios importantes nas propias estruturas
e dinámicas familiares. Identificáronse
familias que retiraron aos maiores de residencias para poder sobrevivir
coas súas pensións (ademais daquelas que deixaron de levalos aos centros de día
por non poder asumir os co-pagos destas). Unha das consecuencias deste feito
foi o retorno de moitas mulleres ao fogar para coidar novamente dos membros
maiores ou dependentes da familia.
Tamén se identificaron familias ás que de pronto regresaron fillos e fillas
xa independizados, algún deles coas súas propias familias formadas, a partir dunha
situación de paro prolongado co conseguinte problemas da incapacidade de pagar recibos
ou o propio alugueiro. As situación de “multiconvivencia” no mesmo fogar non
sempre son fáciles xa que coexisten varias xefaturas de fogar no mesmo espazo,
e a presión sobre os ingresos é moi grande.
Aínda así, púidose comprobar que en Ourense o impacto da crise reforzou a
solidariedade intra-familiar, en especial, respecto de avoas e avós que se
fixeron cargo dos seus netos e netas para permitir que os proxenitores puidesen
traballar ou procurasen emprego. Esta solidariedade familiar é moi forte no
ámbito rural onde as redes familiares tentan dar abrigo aos familiares máis
vulnerables, alí ate onde poden.
Na investigación tamén se recolle que cada xeración evidencia unhas
problemáticas propias. Os menores de 30 anos teñen moitas dificultades para
insertarse laboralmente, independizarse da casa dos seus proxenitores e
realizar así a súa transición á vida adulta. Esta situación impide a formación
de novas familias. Pola súa parte, a franxa dos adultos sufriu intensas reducións salariais (cando non
directamente o desemprego) provocando grande impacto nos menores ao seu cargo
(incapacidade de pagar gastos relacionados coa escolarización –transporte,
comedor- ou actividades extra-escolares). As persoas maiores de 65 anos tiveron
que asumir en moitas ocasións a responsabilidade de soster ás familias dos seus
fillos e fillas, a partir dunhas xa precarias e insuficientes pensións.
Unha das conclusións da
investigación foi que o sistema público de servizos sociais é claramente
insuficiente para dar respostas as necesidades das familias mais impactadas
pola crise: o número de profesionais de atención directa, os recursos e as prestacións téñense
reducido, mentres que creceron as
situación de emerxencia das familias. A totalidade de profesionais consultados
no estudo coinciden en que a resposta ás necesidades das familias ante a crise
foi moi feble e os recursos resultan insuficientes. Os concellos non tiveron
capacidade de resposta para atender a veciñanza con maiores dificultades
sociais. Ante esta situación as necesidades se canalizaron cara entidades do
terceiro sector e mesmo iniciativas das redes informais que puxeron en marcha,
por exemplo, bancos de alimentos ou de roupa.
En todo caso, segundo a investigación, os colectivos mais afectados polo
impacto da crise foron familias con
fillos menores ao seu cargo, a xuventude desempregada en busca do primeiro
emprego, mulleres soas con cargas familiares e familias con persoas con
discapacidade e dependentes.
Carmen Verde-Diego
No hay comentarios:
Publicar un comentario